ORDINAZZJONI TA’ SITT SAĊERDOTI ĠODDA

Mons. Arċisqof Ġużeppi Mercieca, nhar il-Ġimgħa, 30 ta’ Ġunju 2006, fil-Konkattidral ta’ San Ġwann, Valletta, fis-6.30p.m., se jordna sitt saċerdoti ġodda. Is-saċerdoti huma erbgħa djoċesani u tnejn reliġjużi. Dawn huma ir-Rev. Andrew Borg mill-Parroċċa ta’ Marija Immakulata Kunċizzjoni fil-Ħamrun, ir-Rev. Michael Bugeja S.J., ir-Rev. Reuben Gauci mill-Parroċċa ta’ San Nikola ta’ Bari fis-Siġġiewi, ir-Rev. Louis Grech S.D.B., ir-Rev. Darren Pace mill-Parroċċa ta’ Marija Assunta  fil-Mosta u ir-Rev. Dunstan Xuereb mill-Parroċċa ta’ San Nikola ta’ Bari, is-Siġġiewi.

Nhar il-Ħamis, 29 ta’ Ġunju 2006, fit-8.00p.m., se tiġi organizzata siegħa adorazzjoni fis-Seminarju ta’ l-Arċisqof, ir-Rabat, b’talb speċjali għal dawn id-djakni li se jiġu ordnati saċerdoti ġodda. Kulħadd jista’ jattendi.

Il-pubbliku li jattendi għall-ordinazzjoni tal-Ġimgħa hu mfakkar li fil-KonKattidral mhumiex permessi żraben bit-takkuna bil-ponta.

FESTA TAL-BEATU NAZJU FALZON

Nhar is-Sibt, l-1 ta’ Lulju, tiġi ċelebrata f’artna l-festa tal-Beatu Malti Nazju Falzon. Fil-knisja Tal-Ġiżwiti, Valletta, il-knisja fejn fis-sena 1844 il-Beatu Nazju Falzon waqqaf “Kongregazzjoni” għall-membri tas-Servizzi u li fiha ħejja 665 persuna għas-Sagrament tal-Magħmudija jew biex jiġu milqugħa fil-Knisja, fl-1 ta' Lulju fl-10.00 a.m. se tiġi ċelebrata Quddiesa għall-membri u ex-membri tas-Servizzi. F’nofsinhar ikun hemm Quddiesa oħra għall-Kattoliċi li jitkellmu bl-Ingliż u għall-Maltin miżżewġin ma’ barranin.

Il-ġurnata ta’ qabel, il-Ġimgħa, 30 ta’ Ġunju, fis-5.45p.m. fl-istess knisja jsir it-tesserament tal-membri tal-“Catholic Enquiry Centre” li l-Beatu Nazju Falzon hu patrun tagħhom. Fis-6.00p.m. issir mixja mill-knisja Tal-Ġiżwiti għall-knisja tal-Patrijiet Franġiskani Minuri, Ta’ Ġieżu, bl-Urna bil-fdalijiet tal-Beatu Nazju Falzon, fejn fis-6.15p.m. tibda Quddiesa għall-morda.