Ftit ħsibijiet miġbura minn Joe Farrugia

TIBŻAX, BISS INTI EMMEN.

Sena B -

IT-TLETTAX-IL ĦADD MATUL IS-SENA


 Qari mill-Evanġelju ta’ San Mark. (Mk 5, 21-43)
 

F’dak iż-żmien: Wara li Ġesu’ reġa’ qasam bid-dgħajsa għax-xatt l-ieħor, waqt li kien ħdejn il-baħar inġabret madwaru kotra kbira ta’ nies. U ġie wieħed mill-kapijiet tas-sinagoga, jismu Ġajru. Dan, malli rah, inxteħet f’riġlejh, u talbu ħafna u qallu: “Binti ż-żgħira waslet fl-aħħar; ejja qiegħed idek fuqha, ħalli tfiq u tgħix’’. U Ġesu’ telaq miegħu, b’kotra kbira miexja warajh, kulħadd iross fuqu.
(U kien hemm mara li kienet ilha tnax-il sena sħaħ tbati bit-tnixxija tad-demm. Kienet batiet wisq taħt ħafna tobba, nefqet kulma kellha, u mhux biss ma swielha xejn, imma talli marret għall-agħar. Meta semgħet b’Ġesu’, ġiet qalb il-folla, resqet warajh u messitlu l-mantar, għax qalet: “Jekk immiss imqar il-mantar tiegħu, inkun imfejqa.’’ F’daqqa waħda t-tnixxija tad-demm waqfitilha, u ġewwa fiha ħasset li kienet fieqet mill-marda tagħha.
Ġesu’ minnufih intebaħ bil-qawwa li ħarġet minnu, u dar lejn il-kotra u staqsa: “Min messli l-mantar?’’ Id-dixxipli tiegħu qalulu: “Qiegħed tara dawn in-nies kollha jrossu madwarek, u tistaqsi, ‘Min messni’’’? Hu beda jħares madwaru biex jara jilmaħx lil dik li kienet għamlet dan. Imbagħad il-mara, tirtogħod bil-biża’ għax għarfet x’kien ġralha, resqet, xteħtet f’riġlejh u sqarritlu s-sewwa kollu,. “Binti,’’ qalilha, “il-fidi tiegħek fejqitek; mur bis-sliem u kun imfejqa mill-marda tiegħek’’.)
Kif kien għadu jitkellem, waslu xi wħud mid-dar tal-kap tas-sinagoga u ‘l dan qalulu: “Bintek mietet; għalfejn tħabbtu iżjed ‘l-Imgħallem?’’ Iżda Ġesu’ sema’ x’kienu qegħdin igħidu, u qal lill-kap tas-sinagoga: “Tibżax, biss inti emmen.’’ U ma ħalla ‘l ħadd imur miegħu ħlief lil Pietru, ‘il Ġakbu, u ‘l Ġwanni ħu Ġabku.
Waslu d-dar tal-kap tas-sinagoga, u ra storbju sħiħ u nies jibku u jixhru. Daħal, u qalilhom: “Dan l-istorbju kollu u dan il-biki għalfejn? It-tfajla mhix mejta, imma rieqda.’’ U qabdu jiddieħku bih. Imma hu keċċiehom ilkoll ‘il barra, ħa miegħu ‘l missier it-tfajla u ‘l ommha u ‘l dawk li kienu miegħu, u daħal fejn kienet it-tfajla. Qabdilha ibdha, u qalilha: “Talitha, qum!’’, iġifieri, “Tfajla, qiegħed ngħidlek, qum!’’ Minnufih it-tfajla qamet u qabdet timxi; għax kellha tnax-il sena. U baqgħu miblugħin bil-għaġeb, U hu wissiehom biex dan ma jkun jaf bih ħadd, u qalilhom jagħtuha tiekol.



Il-Kelma tal-Mulej
 

 

Ejja qiegħed idek fuqha, ħalli tfiq u tgħix –

Fit-Testment il-Qadim kien meqjus li meta persuna tqiegħed idejha fuq persuna oħra, dan kienet tagħmlu biex tagħti l-ispirtu tagħha lil dik il-persuna.  Jekk  il-persuna li qed twettaq ir-rit jkun fiha spirtu tajjeb, allura l-oħra tirċievi spirtu tajjeb. Jekk l-ewwel persuna jkollha fiha spirtu ħażin, allura t-tieni waħda tirċievi wkoll spirtu ħażin.

Ġesù kien spiss iqiegħed idejħ fuq persuni morda u dawn kienu jfiequ. “Ressqulu quddiemu xi tfal żgħar biex iqiegħed idejh fuqhom u jitlob għalihom.” (Mt 19:13)  Ġo Nażaret huwa qiegħed idejh fuq ftit morda u fejjaqhom. (Mk 6:5)  L-istess għamel ma’ l-għama ta’ Betsajda (Mk 8:23), mal-folla ta’ morda li nġabru ħdejn id-dar ta’ Xmun Pietru f’Kafarnaum (Lq 4:40), mal-mara mfejqa f’jum is-Sibt (Lq 13:13) u ma tant u tant oħrajn. 

Wara Ġesù, l-Appostli kienu jagħmlu l-istess, imma l-Ispirtu li kienu jagħtu huma ma kienx dak tagħhom imma l-Ispirtu ta’ Kristu, għaliex dak li kienu jwettqu kienu jagħmluh f’isem Ġesù.

Ġesù huwa l-Iben ta’ Alla, u l-Ispirtu tiegħu huwa l-Ispirtu s-Santu – id-Difensur, l-Ispirtu li jagħti l-ħajja, li jfejjaq, li jagħti l-kliem u s-smiegħ, li jaħfer.  Meta jqiegħed idejh fuqhom Ġesù kien jgħaddilhom l-ispirtu tiegħu, l-Ispirtu s-Santu.  Kien dan li jfejjaqhom.  Imma bla fidi dan ma kienx ikun possibli, lanqas għall-Ġesù nnifsu – l-istess kif darba kien ġara f’Nażaret.

Imma Ġajru wera l-fidi tiegħu f’Ġesù. “Ejja qiegħed idek fuqha, ħalli tfiq u tgħix.”  U jiena?  Għandi fidi, imqar daqs dik ta’ Ġajru? Lili Ġesù mhux biss iqiegħed idejh fuqi, imma jidħol fija permezz ta’ l-Ewkaristija.  Nemmen jew ma nemminx?

 

Jekk immiss imqar il-mantar tiegħu, inkun imfejqa –

Anke din il-mara uriet  fidi kbra; forsi akbar minn dik ta’ Ġajru.  Għaliha, li sempliċi tmiss mal-mantar tiegħu kien ikun biżżejjed. Bosta kienu qed imissu miegħu, imma mhux bħala. Hi kellha l-fidi. Kienet ċerta li se tkun imfejqa, anke jekk Ġesú ma jindunax li messitu. Imma Ġesú induna.  Induna mhux biss li messet miegħu, kif kienu qed imissu l-oħrajn kollha, iżda induna wkoll bil-fidi li kellha għax intebaħ bil-qawwa li ħarġet minnu. Il-qawwa ta’ l-Ispirtu, li anke mingħajr it-tqegħid ta’ l-idejn, jgħaddi l-istess.  Basta jkun hemm il-fidi.  “Binti,’’ qalilha, “il-fidi tiegħek fejqitek.”

 

Tibżax, biss inti emmen –

Nistħajjel lil Ġajru jgħidlu, “Nemmen, iva! Imma kif jista’ jkun ma nibżax?  Binti mejta u inti qed tgħidli tibżax!”

Iva, il-biża spiss timblokka l-fidi.  Il-biża spiss hija sinjal ta’ nuqqas ta’ fidi.  Lill-appostli, li kienu miegħu fuq id-dgħajsa waqt il-maltemp, ċanfarhom, “Dal-biża kollu għalfejn?  Mela m’għandkomx fidi?”

Iżda l-messaġġ ta’ Ġesú ma kienx għal Ġajru biss għax jiena wkoll nibża.  Nibża ħafna.  Nibża dwar dak li ġara fl-imgħoddi.  Nibża dwar dak li qed jiġri llum.  Nibża anke dwar x’jista’ jiġri fil-futur.  U għalhekk lili wkoll, nistħajjel lil Ġesú qed jgħidli, “Dal-biża kollu għalfejn?  Mela m’għandekx fidi?”

Jiena nisrani. Ngħid li nemmen.  Imma, tgħid tassew għandi fidi?

 

Ara wkoll - Mixja ta' Fidi mis-Segretarjat għall-Katekeżi >>>