Fl-ewwel parti tad-Diskors dwar il-Ħobż tal-Ħajja, Ġesù qal lill-poplu li huwa “l-ħobż li niżel mis-sema”: Bil-miġja tiegħu fostna fl-Inkarnazzjoni, huwa wettaq il-missjoni li tah il-Missier. Fit-tieni parti tad-diskors, Ġesù qal lil-Lhud li l-Ħobż huwa Ġismu għall-ħajja tad-dinja. Bl-Ewkaristija, li tmantni lill-bnedmin bil-preżenza u bil-ħajja tiegħu, huwa jkompli l-missjoni tiegħu fid-dinja matul iż-żminijiet.

Fit-tielet parti, dik li se nagħmlu llum, Ġesù jaffaċċja lid-dixxipli tiegħu biex jieħdu pożizzjoni. L-Inkarnazzjoni u l-Ewkaristija ma jistgħux iħalluna indifferenti. Lesti li l-għażliet li għamel Ġesù fl-Inkarnazzjoni u fl-Ewkaristija nagħmluhom tagħna, jew irridu nimxu bil-kriterji tad-dinja? Lesti li nħallu l-Kelma u l-eżempju tiegħu jmantnuna jew ninsistu li nimxu għal rasna?

Tajjeb li nżommu quddiem għajnejna, kif l-Evanġelju jiddeskrivi n-nies differenti li kellu quddiemu Ġesù f’kull waħda mit-tliet partijiet tad-diskors. Fl-ewwel parti, kienu “in-nies - in-naħa l-oħra tal-baħar”; fit-tieni parti kienu “l-Lhud”, u Ġesù kien jinsab “jgħallem fis-sinagoga f’Kafarnahum”. Issa, f’din l-aħħar parti, Ġesù qed jitkellem mad-“dixxipli tiegħu”, jiġifieri magħna lkoll, in-nies tal-Komunità tiegħu.

1. “Iebes dan id-diskors. Min jista’ jifilħu?” - “Tridux tmorru intom ukoll?”

Ġesù fl-Inkarnazzjoni “ħa l-ġisem”; fl-Ewkaristija, “il-ġisem” isir “ħobż mogħti u demm li jixxerred”. “Tiekol minn dan il-Ħobż” ifisser  tassimila u tagħmel tiegħek il-misteru tal-Inkarnazzjoni u l-Ewkaristija, billi bħal Ġesù, “tinkarna” int ukoll biex ssir “ħobż li jittiekel mill-bnedmin”. Il-ħobż ma jeżistix għalih innifsu, imma biex jittiekel u jagħti l-ħajja lil min hu bil-ġuħ. Hekk għamel Ġesù. U hekk jistenna li jkunu d-dixxipli tiegħu. Għalih m’hemmx triq tan-nofs: Jew naċċettawh u bħalu nsiru “ħobż li jitqassam”, jew nitfixklu  bih, nitilquh u nfixklu lill-oħrajn.  

Dan kien kliem “iebes wisq” għas-semmiegħa ta’ Ġesù. U “minn dak inhar bosta mid-dixxipli tiegħu telquh u ma baqgħux imorru warajh.” L-Ewkaristija u l-Inkarnazzjoni jqiegħdu lill-bniedem quddiem deċiżjoni. U hawn jibdew il-kriżijiet u l-abbandun.

Jidher li f’din il-parti tad-Diskors, San Ġwann kellu f’moħħu s-sitwazzjoni fil-Komunità tiegħu. Fil-Komunità ta’ Ġwanni wkoll kien hemm xi wħud li ħasbu li tista’ tkun Nisrani, tgħid li tħobb u tagħti qima lil Alla, mingħajr ma “tinkarna” u “tagħti lilek innifsek” lill-oħrajn. Għalihom, u għalina, San Ġwann ħass li għandu jikteb l-Ewwel Ittra tiegħu. Ta’ min jaqraha sħiħa mill-bidu sa l-aħħar wara s-silta tal-Evanġelju tal-lum.

2. “Hu l-Ispirtu li jagħti l-ħajja, il-ġisem ma jiswa għal xejn.”

L-Ispirtu ta’ Alla huwa mħabba. L-Ispirtu jsawwab l-imħabba ta’ Alla fi qlubna L-Ispirtu ta’ Ġesù, juri lid-dixxipli li l-ħajja trid “titqassam”. Min iħobb bl-imħabba ta’ Alla jaf li l-ħajja ma tagħmilx sens jekk ma ssirx ħobż, “mogħti” u “maqsum” mal-oħrajn. U meta l-ħajja tagħraf “taqsamha”, saħansitra l-mewt issir l-aqwa espressjoni ta’ l-imħabba, l-għotja tal-ħajja.

Min-naħa l-oħra, “il-ġisem” hawn ifisser il-bniedem li jippretendi li hu suffiċċjenti għalih in-nifsu, u ma joqgħodx għall-Ispirtu ta’ Alla. Dan it-tip ta’ bniedem ma jifhimx kif, u mhux kapaċi jsir, ħobż għall-oħrajn. Ġesù kellu jistqarr: “Hawn xi wħud fostkom li ma jemmnux.” San Ġwann jispjega: “Għax kien jaf Ġesù mill-bidu min kienu dawk li ma jemmnux, u min kien se jittradih.”  Ġuda, dak li ttradixxa lil Ġesù, jirrappreżenta lil kull bniedem li ma jifhimx il-ħajja bħala offerta għall-oħrajn. Minflok ta ħajtu, għażel li jagħti għall-mewt lil ħabibu.

Fil-fatt Ġuda, u min hu bħalu, ikun għażel il-mewt, anki jekk jibqgħu ħajjin. Għax il-ħajja ssir mewt jekk ma tagħtihiex: “Nafu li għaddejna mill-mewt għall-ħajja, dan nafuh għax inħobbu lil ħutna; min ma jħobbx jinsab fil-mewt. . .  Ġesù Kristu ta ħajtu għalina. Aħna wkoll mela għandna nagħtu ħajjitna għall-aħwa” (ara 1Ġw 3,13-18).

3. “Ħadd ma jista’ jiġi għandi jekk ma jkunx mogħti lilu mill-Missier.”

Permezz tal-Evanġelju sirna nafu li l-Missier ħalla kollox f’idejn Ġesù (Ġw 6,37); u li hu permezz ta’ Ġesù li l-Missier jiġbed lejh lill-bnedmin (Ġw 6,44). Għalhekk, biex jingħaqdu mal-Missier, il-bnedmin iridu jersqu lejn Ġesù (Ġw 6,45). Għal din ir-raġuni Ġesù, aktar ’il quddiem, jgħidilna: “Jien hu t-Triq, il-Veritàu l-Ħajja.” (Ġw 14,6).

Ġesu’ huwa t-triq lejn il-vera ħajja, il-ħajja li Alla jrid għal kulħadd. M’hemmx triq oħra: Jew naġixxu bħal Ġesù, u hekk naslu sal-Missier tal-ħajja; jew inħallu lil Ġesu’ u nxaqilbu lejn il-proġett li jġib il-mewt. Għal Ġesù m’hemmx triq tan-nofs. Għalhekk il-kelma tiegħu ħafna sabuha iebsa, u ħafna mid-dixxipli tiegħu telquh u ma baqgħux imorru warajh.

Imbagħad Ġesù qal lit-Tnax: “Tridux tmorru intom ukoll?” . Xmun Pietru wieġeb f’isem il-grupp: “Mulej għand min immorru? Inti għandek il-kliem tal-ħajja ta’ dejjem.” Pietru jitkellem fil-plural f’isem kulħadd. Hija t-tweġiba ta’ dawk, li f’kull post u f’kull żmien, jagħrfu li ma hemmx triq oħra jekk mhux dik ta’ Ġesù - li sar bniedem fostna, ħobż għall-ħajja tal-bniedem.

“U aħna emminna u għarafna li inti l-Qaddis ta’ Alla”. “L-espressjoni “il-Qaddis ta’ Alla” tfakkar fit-Tieni Salm (2, 2.7), salm messjaniku li jitkellem minn Sultan Messija li hu fl-istess ħin Iben ta’ Alla. Ġesù huwa dan is-Sultan Messija, ikkonsagrat lil Alla. Tistqarru bħala l-Qaddis ta’ Alla jfisser li  tagħraf li ma hemmx triq oħra ħlief tiegħu. “Temmen u tagħraf” lilu jfisser li tqiegħed il-fiduċja kollha fih, timxi warajh fit-triq u fil-ħajja tiegħu, u timpenja ruħek biex twettaq dak li wettaq hu.

L-Evanġelju għal ħajjitna llum

1. L-appostli għamlu għażla ċara għal Ġesù u għall-proġett ta’ ħajtu: “Mulej għand min immorru. Inti għandek il-kliem tal-ħajja ta’ dejjem.” Aħna għamilnieha din l-għażla tagħna favur Ġesù u l-Evanġelju tiegħu? Kif qed tidher f’ħajjitna? (Ara wkoll t-Tieni Qari tal-lum).  

Fl-Inkarnazzjoni, il-Kelma ta’ Alla ħadet il-ġisem u għammret fostna. M’hux biss saret bniedem, imma għammret fostna, saret parti mill-istorja tagħna bnedmin. Fl-Ewkaristija, il-Ġisem ta’ Kristu jsir “ħobż mogħti u demm imxerred” għall-ħajja tad-dinja.

San Pawl fit-Tieni Qari tal-lum jagħti mod konkret kif dan l-ideal għandhom jgħixuh il-miżżewġin Insara, billi jħobbu lil xulxin “bħalma Kristu wkoll ħabb il-Knisja tiegħu u ta lilu nnifsu għaliha”. Dak li jgħid San Pawl dwar il-ħajja bejn il-miżżewġin jgħodd ukoll għall-ħajja tad-dixxipli ta’ Ġesù fl-ambjenti kollha tal-ħajja.

2. Minn dawk li jimxu warajh u jilqgħuh f’ħajjithom Ġesù jistenna li jkunu huma wkoll “inkarnati” u “mogħtija” . Ma talabx biex jitwarrbu mid-dinja imma biss biex il-Missier iħarishom mill-Ħażin u biex iqaddishom fil-verità (ara Ġw 17, 9-26). Il-qdusija vera ma taqtax lill-bniedem minn ħutu l-bnedmin; iżda bil-maqlub, tagħmlu “ħobż li jinqasam” u “demm li jixtered” fuq l-eżempju ta’ Ġesù. 

U Komunità Nisranija li kapaċi torganizza Liturġija mill-isbaħ, imma li ma tinteressax ruħha u ma timpenjax ruħha biex ittejjeb l-ambjent, il-ħajja u r-relazzjonijiet  tal-bnedmin, hija komunità li qed tonqos serjament mill-missjoni tagħha.

3. Ġesù, jistenna mid-dixxipli tiegħu li  jkunu bnedmin “umani” fis-sens kollu tal-kelma. Li jkunu mħarrġin fl-iskola ta’ “l-umanità” tiegħu: attenti għal dak li jiġri madwarhom; iqisuh fid-dawl tal-Kelma ta’ Alla; jiġbdu l-attenzjoni dwar il-ħtiġijiet u d-drittijiet ta’ min m’għandux vuċi; u jagħtu sehemhom biex  l-ebda “umanità” ma tiġi nieqsa mill-attenzjoni u mill-imħabba li jixirqilha.